Asia Cup Women’s 2026 Bangladesh Ki 1 Badi Chook Shafali Ka Winning Show Aise Palti Puri Baazi Aur Final Mein India

Bangladesh ke liye ye semi-final shayad kaafi der tak yaad rehne wala hai, lekin kisi achhi wajah se nahi. Toss jeetkar bowling ka decision liya, pitch par spinners ko shuru se hi help mil rahi thi aur match ke pehle kuch overs mein sab kuch Bangladesh ke plan ke hisaab se hi jaata hua dikha. Lekin phir Shafali Verma ne aisa gear badla ki Bangladesh ka poora plan dheere-dheere ulta padta chala gaya

India ne Bangladesh ko 40 runs se haraakar Asia Cup Women’s 2026 ke final mein entry maar li hai. India ne pehle batting karte hue 20 overs mein 149/6 banaye aur Bangladesh ki team jawab mein 109/7 tak hi pahunch saki

Lekin agar sirf score dekho to India ki 40-run ki jeet nazar aayegi. Match ko thoda andar se dekho to asli kahani Bangladesh ke missed chances, Shafali ke luck aur phir India ke pressure game ki hai

Toss Bangladesh Ke Haath Mein Tha Shuruaat Bhi Unke Favour Mein Gayi

Dubai ki pitch shuru se hi spin bowlers ke liye kaafi madadgaar thi. Ball pitch par rukkar aa rahi thi aur spinners ko apna game dikhane ka mauka mil raha tha

Bangladesh ne toss jeeta aur batting ke bajay bowling choose ki. Us waqt ye decision galat nahi lag raha tha. India ko starting mein hi ek bada jhatka bhi mil gaya, jab Smriti Mandhana sirf 2 runs banakar out ho gayi

Yahan Bangladesh ke paas India ko pressure mein daalne ka accha mauka tha

Lekin isi ke baad match mein ek aisa naam chala, jiske baad Bangladesh ko apna pehla decision bhi halka padta nazar aane laga

Shafali Ko Mauke Mile Aur Bangladesh Se Game Nikal Gaya

Shafali Verma jab crease par thi, tab Bangladesh ke paas unhe jaldi rokne ke chances the. Lekin fielding mein unse aisi galtiyan hui jinka nuksaan baad mein poori team ko uthana pada

Shafali sirf 1 run par thi jab unka catch chhoot gaya. Iske baad ek aur chance aaya aur Bangladesh usko bhi pakad nahi saka. Yani ek aisi batter jo agar crease par thodi der tik jaaye to game ko kuch hi overs mein badal sakti hai, usko Bangladesh ne baar-baar life de di

Aur Shafali ne bhi phir peeche mudkar nahi dekha

Unhone 40 balls mein 64 runs thok diye. 7 fours aur 3 sixes ke saath aayi is innings ne Bangladesh ke bowlers ka saara pressure uda diya

Jis pitch par spinners ko help mil rahi thi, usi pitch par Shafali ne gaps nikale, boundaries lagayi aur India ko ek aise score tak le gayi jahan se Bangladesh ke liye chase aasaan nahi rehna tha

India Ki Innings Mein Shafali Ke Baad Bhi Runs Aate Rahe

Shafali ke saath Pratika Rawal ne 20 runs ka contribution diya. Baad mein Harmanpreet Kaur ne innings ko sambhala aur 28 balls mein unbeaten 24 runs banaye

Richa Ghosh ne end mein 16 balls par 21 runs jod diye. In chhoti-chhoti contributions ka fayda ye hua ki India sirf Shafali ki innings par depend nahi raha

20 overs ke baad scoreboard par 149/6 tha

Bangladesh ko 150 runs ka target mila aur ab wahi pitch unke saamne doosre rang mein khadi thi

Chase Mein Bangladesh Ko Wahi Pitch Bhaari Pad Gayi

Bangladesh ne target chase karna start kiya, lekin Indian bowlers ne unhe khulkar khelne ka mauka nahi diya

Dilara Akter ne 21 runs banaye, Sobhana Mostary ke bat se 18 runs aaye aur captain Nigar Sultana ne 19 runs ka contribution diya. Sultana Akter ne end tak ladne ki koshish ki aur unbeaten 22 runs banaye

Problem ye thi ki Bangladesh ke paas ek aisi partnership nahi bani jo India ke pressure ko tod sake

Wickets ruk-ruk kar girte rahe aur required run rate ka pressure bhi badhta gaya

Deepti Sharma Ne Chase Ki Kamar Tod Di

India ki taraf se bowling mein sabse bada naam Deepti Sharma ka raha

Deepti ne 4 overs mein sirf 26 runs dekar 3 wickets nikale. Nandini Sharma ne 2 wickets liye aur Shree Charani ko bhi ek wicket mila

Spin-friendly pitch ka India ke bowlers ne poora fayda uthaya. Bangladesh ke batters ko shots lagane ke liye wahi freedom nahi mili jo Shafali ne India ki innings mein le li thi

Aakhir mein Bangladesh 20 overs mein 109/7 tak hi pahunch saki

India ne 40 runs se match jeet liya

Ek Taraf Shafali Ka Luck Doosri Taraf Bangladesh Ki Fielding

Agar poore match ko ek line mein samjho to Bangladesh ki sabse badi problem ye thi ki unhone India ko chances diye aur phir un chances ki keemat chuka di

Shafali ka early catch chhootna uske baad doosra chance miss hona aur fielding mein kuch aur mistakes ye sab milkar India ke favour mein chala gaya

Shafali ne 64 runs ki pari kheli aur Player Of The Match bhi bani

Yani Bangladesh ke paas Shafali ko rokne ke mauke the, lekin unhone un maukon ko haath se jaane diya. Uske baad Shafali ne jo kiya, usne poora match India ke side kar diya

Ab Nazar 13 Tareekh Ke Final Par

Bangladesh ko haraakar India Asia Cup Women’s 2026 ke final mein pahunch chuka hai. Ab 13 tareekh ko final hoga aur India ke saamne aaj ke doosre semi-final ki winner team hogi

India ke liye ye jeet kaafi confidence lekar aayi hai. Team ne batting mein ek bada total khada kiya, bowling mein pressure banaye rakha aur knockout match mein apna kaam poora kar diya

Ab trophy se India sirf ek jeet door hai

Aur Bangladesh ke liye sabse bada sawaal shayad ye hi rahega ki agar Shafali ko wo early chances nahi milte, to kya match ki kahani kuch aur hoti

Last message

Ab India final mein hai aur 13 tareekh ko trophy ke liye aakhri jung hogi. Shafali ka bat jis tarah chala hai, uske baad Indian fans ki ummeed aur bhi badh gayi hogi

Aapko kya lagta hai, final mein India ka sabse bada match-winner kaun banega Shafali Verma, Deepti Sharma ya koi surprise player

Comment mein apni apni Rai  zaroor batao aur apna cricket lover doston ke sath share karna bilkul bhi Na bhule aur cricket ki har live aur latest update ke liye hamare Sath Bane Rahe Cric spot Hindi per 

     

                ...Author: Shanu Dhoni Sir Fan Boy...