Asian Games 2026 Bangladesh ko hara India Women Final mein ab Sri Lanka ke khilaf Gold Medal ki takkar

Asian Games 2026 mein Indian women’s cricket team ne aaj ek baar phir apna dum dikha diya Bangladesh Women ke khilaf semifinal mein India ne pehle batting karte hue 20 overs mein 195/4 ka bada score khada kiya aur phir Bangladesh ki poori team ko sirf 81 run par rok diya. India ne ye match 114 run se jeetkar seedha Gold Medal Final ka ticket pakad liya Aur is poore match mein sabse badi kahani rahi Shafali Verma ki jinhone aisi batting ki ki Bangladesh ke bowlers ke paas dekhne ke alawa zyada kuch bacha hi nahi

Ab sawal ye hai ki India itne bade score tak kaise pahucha, Shafali ne aisa kya kar diya Bangladesh ki chase kahan toot gayi aur Asian Games 2026 mein India ka safar ab kis mod par pahunch gaya hai Chaliye aaj ke is poore match ko shuru se samajhte hain, kyunki India ki ye jeet sirf scorecard par 114 run ki jeet nahi hai balki poori team ke ek saath aakar khel dikhane ki kahani hai

Toss jeeta India ne aur pehle batting ka faisla hua

India Women aur Bangladesh Women ke beech ye Asian Games 2026 ka semifinal tha. Match Korogi Sports Park, Nisshin mein khela gaya aur toss India ke paksh mein raha. India ne toss jeetkar pehle batting karne ka faisla kiya Ab yahan se Indian team ko ek bada score banana tha, kyunki knockout match mein har run ka apna alag matlab hota hai

India ki opening ke liye Smriti Mandhana aur Shafali Verma maidan par aayi aur dono ne shuruaat se hi Bangladesh ke bowlers par pressure banana shuru kar diya Smriti Mandhana ne 19 balls mein 37 run banaye jisme 5 fours aur 2 sixes shamil rahe Smriti ke out hone tak India ke score par 72 run aa chuke the aur India ko ek strong start mil chuka tha Lekin asli toofan abhi aana baaki tha

Shafali Verma ne 49 balls mein thok diya 100

Smriti ke out hone ke baad Shafali Verma ne apna andaaz bilkul nahi badla. Wo crease par jami rahi aur Bangladesh ke bowlers ke khilaf lagatar boundary lagati rahi Dheere-dheere innings aisi stage par pahunch gayi jahan har over ke saath India ka score tez hota chala gaya

Shafali ne sirf 49 balls mein apni century poori kar di aur 100 run banakar not out rahi. Unki is innings mein 9 fours aur 3 sixes aaye. Strike rate bhi 200 ke paar raha jo batata hai ki unhone kis speed se Bangladesh ke bowling attack ko handle kiya

Sabse khaas baat ye thi ki Shafali ne apni innings ko sirf ek personal milestone tak nahi rakha. Unhone poore 20 overs ki Indian innings ko ek bade total ki taraf dhakel diya Unki 100 ran ki Nabard wali innings hi wo badi wajah bani jiske dum par India scoreboard par 195/4 tak pahunch gaya

Harmanpreet Kaur ne bhi diya Shafali ka saath

Shafali ko doosre end se Harmanpreet Kaur ka bhi achha support mila. Harmanpreet ne 33 balls mein 40 run banaye. Unki innings mein 6 fours aaye aur unka strike rate 121.21 raha

Dono ke beech ki partnership ne India ko beech ke overs mein sambhala aur phir Shafali ne aakhri tak khade rehkar score ko aur upar le jane ka kaam kiya. India ki innings mein Richa Ghosh ne 4 balls mein 2 run banaye jabki Gunalan Kamalini 10 balls mein 3 run banakar out hui Bharti Fulumali 5 balls mein 9 run banakar not out rahi  

India ne 20 overs ke baad 4 wickets par 195 run bana diye. Bangladesh ke saamne ab 196 run ka target tha, aur semifinal jaise match mein ye target aasaan bilkul nahi tha

Bangladesh ki batting shuru hui, lekin India ke bowlers ne laga diya pressure

Bangladesh jab target chase karne utri to unhe shuruaat se hi wickets bachakar run rate ke saath chalna tha Lekin India ke bowlers ne unhe khulkar khelne ka mauka hi nahi diya

Bangladesh ki taraf se Dilara Akter ne 23 balls mein 27 run banaye Unki innings mein 4 fours aur 1 six raha Sultana Khatun ne 8 balls mein 12 run banakar not out rehne ki koshish ki lekin baaki batting order se Bangladesh ko wo support nahi mila jo itne bade target ke liye chahiye tha

Bangladesh ki poori team 15.4 overs mein 81 run par all out ho gayi. Iske saath hi India ne semifinal ko 114 run se apne naam kar liya

Nandani Sharma aur Deepti Sharma ki bowling ne Bangladesh ki kamar tod di

India ki bowling mein Nandani Sharma sabse zyada wickets lene wali bowlers mein rahi. Unhone 4 overs mein 25 run dekar 3 wickets liye. Deepti Sharma ne sirf 2.4 overs mein 7 run dekar 3 wickets apne naam kiye

Shree Charani ne bhi 3 overs mein 7 run dekar 2 wickets liye. Shreyanka Patil ne 3 overs mein 22 run dekar 1 wicket liya jabki Kranti Gaud ne 3 overs mein 20 run dekar 1 wicket hasil kiya

Bangladesh ke wickets ek ke baad ek girte gaye aur chase kab 100 ke andar simat gayi iska unhe khud bhi andaaza nahi laga. India ke bowlers ne 195 ke target ko Bangladesh ke liye poori tarah door bana diya

India ka Asian Games 2026 mein safar Japan se shuru hua tha

Aaj ki semifinal jeet se pehle India Women ka quarter-final Japan Women ke khilaf hua tha. Ye match 18 September ko khela gaya tha aur India ne Japan ko 8 wickets se hara diya tha

Japan ne pehle batting karte hue 19.5 overs mein 57 run banaye the. India ne is chhote se target ko sirf 5 overs mein 2 wickets khokar 59 run banakar chase kar liya tha

Us match mein Shafali Verma ne sirf 15 balls mein 40 run ki not out innings kheli thi Unki innings mein 6 fours aur 2 sixes aaye Richa Ghosh ne bhi 6 balls mein 12 run banakar not out rehkar chase ko khatam kiya tha

India ke bowlers ne bhi Japan ke khilaf shuruaat se hi control rakha tha. Shree Charani ne 4 overs mein 10 run dekar 4 wickets liye jabki Shafali Verma aur Shree Charani ke alawa Shreyanka Patil aur Deepti Sharma ne bhi wickets nikale the

Yani India ka Asian Games 2026 ka safar pehle Japan ke khilaf ek badi jeet se aage badha aur phir Bangladesh ke khilaf semifinal mein 114 run ki zabardast jeet tak pahunch gaya

Ab Gold Medal ke liye India ke saamne Sri Lanka

Bangladesh ko semifinal mein haraane ke baad India Women ab Asian Games 2026 ke Gold Medal Final mein pahunch chuki hai. Final mein India ka saamna Sri Lanka Women se hoga

Sri Lanka ne apne semifinal mein Pakistan ko 8 wickets se hara kar Final mein jagah banayi hai. Is tarah ab Gold Medal ke liye India aur Sri Lanka ke beech muqabla hoga

Final 22 September 2026 ko Korogi Sports Park Aichi-Nagoya, Japan mein khela jayega. Match Indian time ke hisaab se 10:30 AM IST se shuru hoga

Isi din Bangladesh aur Pakistan ke beech Bronze Medal match bhi hona hai lekin India ka focus ab seedha Gold Medal par rahega

Shafali Verma ke 100 ne semifinal ko bana diya India ke naam

Aaj ke match ko agar ek naam se yaad kiya jayega to wo Shafali Verma ka naam hoga 49 balls mein 100 run 9 fours aur 3 sixes ke saath Shafali ne Bangladesh ke saamne India ke liye wo platform bana diya jahan se baaki team ko sirf pressure banaye rakhna tha

India ne 195/4 ka score banaya aur phir Bangladesh ko 81 par all out kar diya. Ek taraf Shafali ki century ne scoreboard ko bada banaya, to doosri taraf Nandani Sharma, Deepti Sharma aur baaki Indian bowlers ne Bangladesh ki chase ko tikne hi nahi diya

Aur ab kahani semifinal se nikal kar Final tak pahunch gayi hai Japan ko quarter-final mein haraane ke baad Bangladesh ko semifinal mein hara diya gaya hai, aur ab saamne Sri Lanka hai. Yani Asian Games 2026 mein India Women ke paas ab Gold Medal jeetne ka mauka bilkul saamne hai

Cricket Fans ke liye ek baat

Aaj Shafali Verma ki 100 wali innings aur India ki 114 run ki jeet ne match ka poora maza hi badal diya Aapko kya lagta hai India Women aur Sri Lanka Women ke beech Final mein kya hone wala hai Shafali Verma ki aaj ki century ke baare mein aapki kya rai hai Apni rai zaroor share karein comment mein aur apne cricket lover doston ke saath ye breaking news share karna bilkul bhi na bhoolen Cricket ki har live update aur romanchak news ya kisso ke liye hamare saath bane rahen cricspothindi.in par

                   ...Author: Shanu Tiwari...