India vs Afghanistan 1st T20 Ek Hi Pitch Par Do Alag Khel Sanju Samson Ki Wapsi Arshdeep Ka Jhatka Aur Abhishek Sharma Ka Tofani 82 Runs
India aur Afghanistan ke beech pehla T20 match khatam ho chuka hai Scorecard par nazar daalo to lagta hai ki India ne 7 wickets se 38 balls pehle aasaani se jeet haasil kar li Lekin jab aap is match ko shuru se aakhir tak ek kahani ki tarah dekhoge, to pata chalega ki Delhi ke Arun Jaitley Stadium me kitna drama kitna suspense aur pitch ka kitna alag roop dekhne ko mila
Match se pehle jo baatein ho rahi thi, chaho wo pitch report ho ya phir Sanju Samson aur Vaibhav Suryavanshi ke beech ki jung... match me har ek cheez ne fans ko screen se baandhe rakha
Toss Aur Captain Ka Faisla Pehle Bowling Kyun Chuni
Match ki shuruaat hui toss ke saath. Indian captain ne toss jeeta aur bina kisi jhijhak ke pehle bowling karne ka faisla kiya. Delhi ka ground aksar chhota mana jata hai aur yahan night me dew (os) aane ka khatra rehta hai. Isliye toss jeetkar pehle chasetarget par nazar rakhna ek smart move tha
Indian captain ko pata tha ki agar Afghanistan ko pehle batting par bheja jaye aur unhe ek normal score par rok diya jaye, to hamare explosive openers ke liye chase karna kafi aasaan ho jayega. Aur aage chal kar wahi hua bhi
Pitch Ka Sabse Bada Suspense Paata Pitch Par Afghanistan Ka Struggle
Match se pehle jab humne pitch report ki baat ki thi, tab saaf laga tha ki Arun Jaitley Stadium ki wicket ekdam paata aur pure batting paradise hone wali hai. Yahan runs bante hain aur bowlers ke liye zyada madad nahi hoti. Lekin jab match shuru hua, to pitch ne do alag-alag chehre dikhaye!
Jab Afghanistan batting karne utri, to aisa laga jaise pitch me ball ruk kar aa rahi hai aur spinners ko kafi grip mil rahi hai. Afghanistan ke top-order batsmen ek-ek run ke liye struggle karte nazar aaye. Jasprit Bumrah ne pehle hi over me Rahmanullah Gurbaz (0) ko pavilion bhej kar zordar jhatka diya
Uske baad Arshdeep Singh ki sharp bowling (3/19) aur Varun Chakaravarthy ki magical mystery spin (4 overs me sirf 16 runs) ne Afghanistan ke batsmen ko baandh kar rakha. Mid-overs me Azmatullah Omarzai ne 64 runs (44 balls) aur Mohammad Nabi ne 33 runs (27 balls) banakar kisi tarah team ko sambhala. In dono ki fight ke bais Afghanistan 20 overs me 156/8 ke score tak pahunch saki. Ek aisi pitch par jahan 190-200 banna chahiye tha, wahan Afghanistan 156 par simat gayi
Playing 11 Ka Bada Twist Sanju Samson vs Vaibhav Suryavanshi
Match shuru hone se pehle sabse bada topic ye tha ki top-order me kisse chance milega Sanju Samson ya Vaibhav Suryavanshi?
Vaibhav Suryavanshi koi naye khiladi nahi hain, wo England series aur haal hi me hui Zimbabwe series me apni explosive batting ka namuna dikha chuke hain. Zimbabwe series me to Sanju Samson squad me bhi nahi the aur Vaibhav ne teeno matches me zordar performance diya tha. Lekin Ireland series aur England ke pehle match me Sanju ke kharab form ke baad fans ke dimaag me sawaal tha ki kya Sanju ki wapsi hogi
Toss ke waqt ye suspense khatam hua. Team management ne Sanju Samson par bharosa jataya aur unhe playing 11 me jagah mili, jabki in-form Vaibhav ko bahar baithna pad gaya. Halanki Sanju is match me kuch khas nahi kar paaye aur sirf 10 runs (8 balls) banakar Omarzai ka shikar ban gaye, lekin unko khilana ye dikhata hai ki management abhi unhe lambi daud ka ghoda maan rahi hai
Abhishek Sharma Ka Toofan Jab Pitch Ekdam Se Paata Ban Gayi
Lekin jab India 157 runs ka chase karne utri, to lag raha tha jaise pitch hi badal gayi ho! Jis pitch par Afghanistan ke batsmen struggle kar rahe thi, usi pitch par Abhishek Sharma ne aate hi bowlers ki dhajjiya uda di
Abhishek Sharma ne Afghanistan ke kisi bhi bowler ko set hone ka mauka nahi diya. Fazalhaq Farooqi ho ya Rashid Khan, Abhishek ne sabke khilaf fearless cricket kheli. Unhone sirf 32 balls me 82 runs ki tofani innings kheli, jisme 7 chauke aur 7 lambe chhakke shamil the! Unka strike rate 256.25 ka tha, jo dikhata hai ki unka mindset kitna clear tha
Unke saath Ishan Kishan ne bhi 42 runs (33 balls) ki samajhdaar innings kheli aur match ko poori tarah India ke kabze me kar diya. Shreyas Iyer 8 aur Tilak Varma 3 ne aakhiri me baaki bache runs banakar India ko 13.4 overs me hi 7 wickets se jeet dila di
Match Ka Asli Conclusion Aur Takeaway
Ye match humne batata hai ki jab aapke paas Abhishek Sharma jaisa fearless opener ho, to target chahe 150 ho ya 200, chase hamesha aasaan lagta hai. Afghanistan ke liye Omarzai aur Nabi ne achhi fight di, lekin unke top-order ka slow khel aur Indian bowlers ki kadi bowling unhe le doobi
India ne 3 matches ki T20 series me 1-0 ki lead le li hai. Ab dekhna ye hoga ki agle match me kya Vaibhav Suryavanshi ko playing 11 me chance milta hai ya team Sanju Samson ko hi ek aur mauka deti hai
Cricket Fans Ke Liye Ek Baat
Aapke hisaab se is match ka sabse bada turning point kya tha Arshdeep aur Varun ki tight bowling ya Abhishek Sharma ki 82 runs ki tofani innings? Aur kya agle T20 match me Vaibhav Suryavanshi ko playing 11 me khilana chahiye
Apni rai comment me zaroor share karein. Apne cricket lover doston ke saath ye review share karna bilkul mat bhoolna. Cricket ki har live update, bade matches ke records aur aise hi romanchak kahaniyon ke liye hamare saath bane rahiye Cric Spot Hindi Par
...Author: Shanu Dhoni Sir Fan Boy...
🤜🤛
ReplyDelete