IPL Ne Bharatiya Cricket Ko Kaise Badal Diya Sach Jo Aksar Charcha Mein Nahi Aata

IPL ki shuruaat 2008 mein hui thi aur Jab 2008 mein IPL ki pehli gend phenki gayi thi tab sach bataun toh kisi ne socha bhi nahi tha ki ye tournament aage chal kar kitna bada bawaal machane wala hai. Kai logon ko laga tha ki yaar ye bas ek naya T20 tamasha hai do chaar saal chalega aur phir logon ka interest kam ho jayega Lekin aaj lagbhag do dashak baad jab hum peeche mudkar dekhte hain toh samajh aata hai ki IPL ne sirf ek tournament ke roop mein safalta hasil nahi ki, balki Bharatiya cricket ki soch, taiyari, talent ki pehchaan aur players ke career ka poora raasta hi badal diya

​Talent ki khoj se lekar khiladiyon ke mindset tak, IPL ne sab kuch aisi speed se badla ki poori duniya dekhti reh gayi. Aaiye baat karte hain us sach ki jo aksar samachar aur TV charchaon mein dab kar reh jata hai

​Chhote Shahron Ke Ladke Aur Raato-Raat Kismat Badalne Ka Jadu

​IPL se pehle Bharat mein talent ki kami kabhi nahi thi. Har gali, har mohalle mein ek se badhkar ek cricketer mil jata tha. Ranji Trophy jaise tournaments mein bande saalon saal runs banate rehte the, par national team tak pahunchte-pahunchte baal safed ho jaate the

​IPL ne sabse pehle isi gap ko khatam kiya. Achanak ek aisa manch aaya jahan Bikaner, Ranchi ya kisi chhote kasbe ka 19 saal ka ladka duniya ke sabse bade stars ke saath ek hi dressing room mein baithne laga. Rinku Singh, Yashasvi Jaiswal aur Mohammed Siraj jaise khiladiyon ki kahaniyaan is baat ki saboot hain. IPL ne sirf naam nahi diya, balki un parivaaron ko aarthik mazbooti di jinhone cricket ke liye pata nahi kitne papad bele the. Ab domestic cricketer hone ka matlab ye nahi ki aapko paise ki tangi jhelna padega

​Foreign Legends Se Seekha Aur Bada Dil Banaya

​Pehle jab koi naya ladka international match mein Starc ya Cummins jaise bowlers ke samne aata tha, toh thoda nervous hona lazmi tha. Lekin IPL ne is darr ka permanent ilaj kar diya

​Socho, jab 18 saal ka ladka Ricky Ponting ya Michael Hussey se batting ki nuances seekhega, Malinga se yorker dalna seekhega, toh uska confidence kis level par hoga? IPL ne international cricket ke pressure ko pehle hi ghool kar pilana shuru kar diya. Ab jab hamare yuva khiladi Team India ki jersey pehen kar maidan mein utarte hain, toh unke chehre par darr nahi, balki jeet ka junoon hota hai

​Fast Bowling Aur Fitness Mein Unbelievable Jump

​Ek waqt tha jab Indian cricket ka matlab sirf zabardast batting aur spin bowling hua karta tha. Jab team foreign tours par jaati thi, toh opponents fast pitching se hamare batters ko pareshan karte the. Lekin IPL ne is kahani ko poora palat diya

​IPL ki wajah se hamare yahan 145+ kmph ki speed se bowling karne wale launde tayar hone lage. Umran Malik, Mayank Yadav jaise tezz gendbaaz IPL ki hi den hain. Iske alawa T20 cricket ke aane se fielding aur fitness ka standard itna high ho gaya hai ki ab har player ko maidan par 100% dena hi padta hai. Aaj Bharatiya pace attack duniya ke sabse khaufnaak attacks mein gina jata hai

​Bench Strength Itni Mazboot Ki Do Teams Ban Jaayein

​Isi tournament ka nateeja hai ki aaj Team India ke paas zabardast bench strength hai. Agar hamara koi main player injure ho jaaye ya rest le raha ho, toh uski jagah lene ke liye ek se badhkar ek ready-made options mil jaate hain. Pehle ek player ke baahar hone par poori team ka balance bigad jata tha, lekin ab hamare paas har position ke liye do-do, teen-teen talent taiyar baithe hain. Ye depth kisi jadu se nahi bani, balki IPL ke tough competition ki wajah se aayi hai

​Captaincy Mindset Aur Strategic Game Plan Ka Evolution

​IPL ne Bharatiya cricket ko sirf acche players hi nahi diye, balki smart aur chaalaak captains bhi diye hain. Naye naye rules jaise Impact Player Rule aur data analytics ke aane se ab game sirf chauke-chakke marne tak simit nahi raha. Ab har over, har ball par strategy banti hai. Yuva khiladi ab chhoti umar se hi ye seekh jate hain ki tight match kaise jeeta jata hai, kis bowler ko kab lana hai aur pressure situations mein kaise cool rehna hai. Is cheez ne Indian team ke overall cricket IQ ko ek alag hi level par pahuncha diya hai

​Alochana Bhi Huyi Par Sach Wo Hi Hai

​Dekho, har sikke ke do pehlu hote hain. Log kehte hain ki IPL ki wajah se Test cricket ko nuksan pahuncha hai ya players par workload bahut badh gaya hai. Ye baatein kuch hadd tak sahi bhi ho sakti hain. Lekin agar poori picture dekhi jaaye, toh is baat se inkaar nahi kiya ja sakta ki IPL ne Bharatiya cricket ko ek nayi oonchai par pahuncha diya hai

​Aaj jab koi chhota ladka haath mein bat pakad kar sapna dekhta hai toh uske samne rasta pehle se kahin zyada saaf aur roshan hota hai  Use pata hai ki agar andar dum hai aur performance hai toh mehnat bekaar nahi jayega

IPL ab sirf ek tournament nahi raha, ye Bharat mein ek emotion ban chuka hai Ladke aapas mein apne favourite player aur team ke liye ladte hain. Craze itna badh gaya hai ki bina IPL ke ab cricket adhura sa lagta hai. Isse dekhne ke saath-saath sikhne ko bhi bahut kuch milta hai. Isiliye IPL sirf ek league nahi, balki India mein ek tyohar ban gaya hai jiska fans saal bhar bechaini se intezar karte hain taaki apne favourite star ko maidan par dhamaal machate dekh sakein 

​Aapki Kya Rai Hai

​Kya aapko bhi IPL utna hi pasand hai jitna hume Aur IPL mein aap kis player ya team ko dil se support karte hain Please apni rai comment mein zaroor share karein Aur cricket ki har live update, unseen stories aur romanchak kissaon ke liye hamare saath bane rahein Cric Spot Hindi par

         

                    ...Author: Shanu Tiwari...