Ishan Kishan 270 Runs Duleep Trophy Final Me Ishan Kishan Ka Toofan 30 Chauke Aur 7 Chhakke Laga Kar South Zone Ke Udaye Hosh

Domestic cricket me agar aapko lagta hai ki sirf boring aur dheeme match hote hain, toh Duleep Trophy 2026 ke Final match ka Day 2 dekh lijiye! Chennai ke MA Chidambaram Stadium me East Zone aur South Zone ke beech khele ja rahe is maha-mukable me Ishan Kishan ne aisi tabaahi machai hai ki har koi hairan reh gaya hai

National team se bahar chal rahe Ishan Kishan ne selectors ko seedha aur kadak jawab diya hai. Ishan ne South Zone ke bowlers ke samne aisi dhuandhar batting ki, jiski waja se East Zone ne apni pehli inning me 708 runs ka pahad jaisa score khada kar diya

Ishan Kishan Ki 270 Runs Ki Dhamakedar Pari

Ishan Kishan jab pitch par aaye toh East Zone ek achhi position me thi, lekin Ishan ne aate hi match ka naksha hi badal diya. Unhone sirf 334 balls ka samna karte hue 270 Runs ki yaadgar double century thok di. Is toofani pari me unke bat se 30 Shaandar Chauke aur 7 Gagan-chumbi Chhakke nikle

Ishan ka strike rate lagbhag 80.84 ka raha, jo ki Red-ball cricket yaani Test format me bahut hi shaandar mana jata hai. Unki is inning ne yeh saaf kar diya hai ki unke andar runs banane ki kitni bhook hai aur wo Team India me wapsi ke liye kitne desperate hain

Yeh Bhi Padhein: Agar aap Ishan Kishan ki puri life story, unka struggle aur unka international debut ke bare me vistar se padhna chahte hain, toh [ Yahan Click Karein - Ishan Kishan Biography ]

Kumar Kushagra Ka Shatak Aur Baaki Batters Ka Saath

Is match me sirf Ishan Kishan hi nahi chamke, balki East Zone ke baki batters ne bhi zordar contribution diya

Kumar Kushagra (101 Runs) Ishan Kishan ke sath milkar Kumar Kushagra ne zabardast partnership ki aur 132 balls me 101 runs banaye, jisme 8 chauke aur 5 chhakke shamil the

Shikhar Mohan (85 Runs) Top order me Shikhar Mohan ne 120 balls par 85 runs ki samjhdar pari kheli

Abhimanyu Easwaran (72 Runs) Opener Abhimanyu Easwaran ne bhi 72 runs banakar team ko ek solid start diya

In sabhi pariyon ki badaulat East Zone ne 163 overs me 708/10 ka vishal score khada kar diya

Duleep Trophy 2026 Final East Zone vs South Zone Ka Pura Scorecard (Inning Breakdown

Agar is maha-mukable ke pehle innings ke pure scorecard par nazar dalein, toh East Zone ke batters ne Chennai ke maidan par runs barsane me koi kasar nahi chodi. Kaptan Ishan Kishan ne morcha sambhalte hue sabse zyada 334 balls me 270 runs ki aatishi pari kheli, jisme 30 chauke aur 7 lambe chhakke shamil rahe. Unka sath nibhaya Kumar Kushagra ne, jinhone 132 balls me 101 runs banaye (8 chauke, 5 chhakke). Wahi top order me Abhimanyu Easwaran ne 86 balls me 72 runs aur Shikhar Mohan ne 120 balls me 85 runs ka yogdan diya. Yuva Vaibhav Sooryavanshi ne bhi 37 balls par tej-tarrar 44 runs banaye, jabki Sudip Kumar Gharami 6 runs aur Mukesh Kumar bina khata khole out hue. Team ko 17 runs extras ke roop me mile, jiski badaulat East Zone ne 163 overs me 4.34 ke run-rate se 708 runs ka vishal score khada kar diya

Doosri taraf, South Zone ke bowlers ke liye yeh pari kisi agnipariksha se kam nahi rahi. Tripurana Vijay South Zone ke sabse safal bowler rahe, jinhone 42 overs me 180 runs dedekar 4 wickets chatkaye. Unke alawa Chama Milind ne 21 overs me 88 runs dekar 2 wickets liye aur Shreyas Gopal ne bhi 42 overs me 165 runs dekar 2 safaltaayein hasil ki. Shaik Rasheed ko 13 overs me 46 runs dekar 1 wicket mila. Halanki, team ke mukhya tej ghendbaaz Mohammed Siraj ke liye din nirashajanak raha; unhone 25 overs ghendbaazi ki, jisme 140 runs kharch kiye lekin unhein ek bhi safalta nahi mili. MD Nidheesh (15 overs me 58 runs), Devdutt Padikkal (4 overs me 18 runs) aur Ricky Bhui (1 over me 3 runs) ko bhi is innings me khali hath hi rehna pada

Kya Ishan Kishan Ki Team India Me Wapsi Hogi 

Ishan Kishan ki yeh 270 runs ki pari sirf ek double century nahi hai, balki selectors ke liye ek reminder hai ki wo kitne khatarnak form me hain. Duleep Trophy ke Final jaise bade match me pressure ke beech aisi marathon inning khelna dikhata hai ki unka temperament kitna strong hai

Ab dekhna yeh hoga ki South Zone apni pehli inning me 708 runs ke is pahad jaise score ka jawab kaise deti hai

Kya aapko lagta hai ki Ishan Kishan ko Duleep Trophy ke is shandar performance ke baad turant Team India me jagah milni chahiye? Apni rai niche comment box me zaroor share karein aur is update ko Apne cricket lover doston ke sath share karna bilkul bhi Na bhule aur cricket ke aise hi romanchak aur live update ke liye hamare Sath Bane Rahe cric spot Hindi per

          ...Lekhak name: Shanu Dhoni sar fan boy...