South Africa vs Australia 2nd ODI Kangaroo ka sarvanash Australia ne ODI series bhi gawa di aakhir ho kya gaya hai is team ko

Ek waqt tha jab Australia ka naam sunte hi saamne wali team ke dimaag mein pressure aa jaata tha Kangaroo team ko haraana aasaan nahi unke saamne tikna hi badi baat maana jaata tha Lekin aaj tasveer kuch aur hi nazar aa rahi hai

South Africa ke khilaaf doosre ODI mein Australia ko 32 run se haar mili aur isi ke saath teen match ki ODI series bhi Australia ke haath se nikal gayi South Africa ne series mein 2-0 ki ajey badhat bana li hai Lekin sawaal sirf haar ka nahi hai Sawaal ye hai ki Australia ko aakhir ho kya gaya hai

Miller ne akele hi macha diya tabaahi ka manzar

Australia ne toss jeetkar pehle gendbaazi ka faisla kiya tha. Shuruaat mein laga ki faisla kaam karega, lekin South Africa ke ballebaazon ne dheere-dheere poora match apne naam kar liya

Sabse pehle Temba Bavuma ne zimmedari uthai. South African kaptaan ne 116 gendon par 103 run ki shaandaar paari kheli. Unki paari mein do chhakke aur 10 chauke aaye Lekin asli dhamaka abhi baaki tha

David Miller crease par aaye aur phir Australia ke gendbaazon ke khilaaf aisa hamla kiya ki scoreboard dekhte-dekhte bhaagne laga. Miller ne sirf 93 gendon par 142 run thok diye 12 chauke aur 7 chhakke wali is paari ne South Africa ko 50 over mein 365/9 tak pahucha diya

Australia ke liye Josh Edwards ne 5 wicket lekar South Africa ko rokne ki poori koshish ki, lekin doosre chhor se Miller ka toofan rukne ka naam hi nahi le raha tha

366 ka target aur Australia ki shuruaat zabardast

366 run ka target aasaan nahi tha, lekin Australia ne jawab mein buri shuruaat bhi nahi ki

Mitchell Marsh aur Travis Head ne milkar South African gendbaazon par shuruaati dabaav bana diya. Dono ne 84-84 run ki paari kheli. Ek samay Australia ka score dekhkar laga ki match aakhri over tak ja sakta hai Lekin yahin se kahani palat gayi

Openers chale middle order phir dharashayi

Australia ki sabse badi pareshaani ek baar phir saamne aa gayi

Marsh aur Head ke baad middle order se jis partnership ki zarurat thi, woh mil hi nahi paayi. Ek ke baad ek wicket girte chale gaye aur Australia ka chase dheere-dheere haath se fisalta gaya

Cameron Green 17, Josh Edwards 25 Matthew Renshaw 32 aur Alex Carey 17 run hi bana sake. Alex Bartlett ne aakhir mein 50 run banakar thodi ummeed jagayi lekin tab tak match South Africa ke paksh mein kaafi door ja chuka tha

49.5 over mein Australia ki poori team 333 run par all out ho gayi South Africa ne 32 run se match jeet liya

Aakhir Australia ko ho kya gaya hai

Ye sawaal ab sirf fans ka nahi, Australia ki cricket team ke saamne bhi khada hai

Jo team kabhi pressure mein match ko kheench leti thi, aaj wahi team bade chase mein apne middle order se jawab nahi dhoondh pa rahi hai Openers match mein jaan daal rahe hain, lekin unke baad paari ko sambhalne wala koi bada naam lagataar saamne nahi aa raha

Ek samay ki peak Australia team ko dekhne wale fans ke liye ye tasveer waakai hairaan karne wali hai

South Africa ne series par kiya kabza

Is jeet ke saath South Africa ne teen match ki ODI series mein 2-0 ki ajey badhat bana li hai Pehle ODI ke baad doosre match mein bhi Australia ko haraakar Proteas ne saaf kar diya ki ye series ab unke control mein hai

David Miller ki 142 run ki tabaahi bhari paari ko Player of the Match chuna gaya jabki Australia ke liye Josh Edwards ke 5 wicket bhi team ko haar se nahi bacha sake

Ab Australia ke saamne sirf teesra ODI nahi hai. Sawaal ye hai ki teesre match mein team apni izzat bachane ke liye kya jawab deti hai

Kangaroo ki series gayi lekin asli chinta ab ye hai kya Australia waapas wahi Australia ban paayega jisse duniya kabhi dirty thi

Aapki kya rai hai apni Rai please comment Mein Jarur share Karen aur apne cricket lover doston ke sath yah update share karna bilkul Bhi Na Bhule aur sports se Judi Har live update ke liye Hamare Sath Bane Rahe cricspothindi.in per

             ...Author: Shanu Tiwari...